मला पंख असते तर - Mala Pankha Aste Tar

        परीक्षेचा निकाल पहाण्यासाठी मी शाळेत गेले आणि मला समजले मी प्रथम श्रेणीत प्रथम क्रमाकांने उत्तीर्ण झाले आहे. मला इतका आनंद झाला की केव्हा एकदा घरी पोचते व ही बातमी सर्वांना सांगते असे झाले आहे. त्याचक्षणी मनात विचार आला मला जर पंख असते तर किती बरे झाले असते. अशी उडत उडत गेले असते आणि ही आनंदाची बातमी सर्वत्र पोचवली असती.

        मला पंख असते तर काय सुंदर कल्पना ! त्यावेळी मला देवाचाही खूप राग आला. काय बिघडले असते. त्याचे माणसाला त्याने पंख दिले असते, तर नाहीतरी बुद्धी, विचारशक्ती, वाचा इत्यादी अभिमान वाटावा अशा कितीतरी गोष्टी त्याने माणसाला दिल्याच आहेत. त्यात एका पंखांची भर पडली असती तर काय मजा आली असती नाही?

        मला पंख असते तर किती गमती जमती केल्या असत्या मी, माझ्या जीवनात एक वेगळाच रंग भरला गेला असता अभ्यास करून कंटाळा आला तर उंच आकाशात गोल गोल फेऱ्या मारून पुन्हा खाली उतरले असते. या प्रदूषणापासून दूर जाऊन स्वच्छ मोकळ्या हवेत श्वासोच्छवास करून पुन्हा जोमाने अभ्यासाला बसले असते. ट्रॅफिक जाम चा त्रास कधीच जाणवला नसता. रस्यावरची रहदारी टाळता आली असती. मनात येईल तेव्हा, कोठेही कितीही लांब तेही अगदी थोड्या वेळात जाता आले असते.

        आकाशातील सर्व प्रकारच्या पक्ष्यांशी मैत्री केली असती. इंद्रधनुष्यातील रंग अगदी जवळून पाहिले असते. ढगांशी लपंडाव खेळला असता उंच उंच झाडांच्या अगदी नारळाच्या सुद्धा शेंड्यांवर बसून झोके घेतले असते. आवळे, चिंचा, केळ्या झाडावरच बसून मनसोक्त खाल्या असत्या. हिमालयाच्या उंच शिखरावर बसून जगाची पाहणी केली असती. उसळत्या लाटांशी स्पर्धा करत सप्तसमुद्रांवर संचार केला असता.

        मनात अशी ही शंका आली आकाशावर सार्वभौमत्व गाजवणारे हे पक्षी मला ही पंख असणं कितपत सहन करतील. आकाशात केलेले मी अतिक्रमण ते चालवून घेतील का? कदाचित • सर्वजण मिळून मला मारतीलही. अशावेळी पंख असलेली मी एकटी कसे बरे तोंड देईन ? असो ते पाहून घेता येईल.

        पण हे सारे केव्हा ? मला पंख असते तर...

धन्यवाद, तुम्हाला हा निबंध कसा वाटला हे कमेंट बॉक्स मध्ये जरूर कळवा.